Fjármál og rekstur

Rekstrartekjur

Heildartekjur Hagstofu Íslands námu 2.034 m.kr. og jukust um 4% frá fyrra ári. Framlag úr ríkissjóði hækkaði úr 1.645 m.kr. í 1.736 m.kr. eða um 5,5%. Þar af nam fjárfestingaframlag 23,1 m.kr. og tekjufærsla frestaðra tekna á afskriftum 20,3 m.kr. 

Sértekjur Hagstofunnar námu 298 m.kr. sem er um 3% lækkun á milli ára en árið áður námu þær 308 m.kr. Sértekjur Hagstofunnar nema um 15% af heildartekjum. Lækkun sértekna skýrist einna helst af lækkun vegna styrkja frá Eurostat sem kláruðust á árinu en styrkir frá Eurostat námu 86 m.kr. á árinu og 134 m.kr. árið áður. Sveiflur í þessum tekjuflokk eru jafnan miklar á milli ára. Tekjur vegna sérfræðiþjónustu Hagstofunnar námu 128 m.kr. og hækkuðu um 49 m.kr. á milli ára, einkum vegna innlendra samninga. 

Skipting sértekna

• Þjónustusamningar  65 m.kr.

• Seld þjónusta 128 m.kr.

• Styrkir vegna samninga við Eurostat 86 m.kr.

• Aðrar tekjur 18 m.kr.

Rekstrargjöld

Rekstrargjöld ársins námu um 2.028 m.kr. með afskriftum, gjöld jukust um 41 m.kr. á milli ára eða 2%. Stærsti útgjaldaliður Hagstofunnar var sem fyrr launakostnaður sem nam um 84% af rekstrargjöldum ársins. Launakostnaður hækkaði um 64 m.kr. á milli ára sem nemur 4% hækkun. Húsnæðiskostnaður var annar stærsti útgjaldaliðurinn og nam hann um 7% af rekstrargjöldum. 

Skipting gjalda

• Laun, launatengd gjöld og starfsmannakostnaður 1.708 m.kr.

• Húsnæðiskostnaður 136 m.kr.

• Aðkeypt þjónusta 107 m.kr.

• Ferðakostnaður, námskeið og fundir 25 m.kr.

• Almenn rekstrargjöld 25 m.kr.

• Verkkaup  6 m.kr.

• Afskriftir 20 m.kr.

Bókfærð eignakaup

Fjárfestingaframlag ársins var 23,1 m.kr. Eignakaup eru færð til eignar og afskrifuð yfir líftíma eignar. Kaupverð varanlegra rekstrarfjármuna nam 26,6 m.kr. og afskriftir 20,3 m.kr.